過氣港男梁裕恆（Flow）早前在社交網爆料，聲稱在三張WhatsApp截圖，有一個電話簡稱叫「M.Y」的人，看到一段有示威者挖磚頭影片後說：「佢老味成班癲X咗」，另外兩張截圖就見到有人陸續離開群組，M.Y再留言：「嘩，走兩件。」並附以4個笑到喊表情圖案，Flow承認此人正是楊明。

楊明今日在將軍澳出席活動，他承認是自己留言並說：「嗰單嘢其實都有好多記者朋友問過我，我都冇乜點樣回應，好多斷章取義嘅嘢我又唔想回應，但係佢又好似夾硬砌咗啲立場畀我，我就覺得，我想重申一點，我係冇話過啲和平嘅示威者，好多正常嘅人睇到佢嘅截圖，都知道我係鬧緊一啲上面嗰條片嗰啲挖磚出嚟、兇啲記者、圍啲記者、鬧啲記者嗰啲人啦！」

楊明還說：「我其實唔需要其他人去畀立場我嘅，我嘅立場好簡單好清晰，就係和平同反暴力，就好可惜啦，我哋喺個group度講嘅嘢，就有人攞咗嚟斷章取義啦，我唔知佢係有啲咩用意啦，咁大家喺個group度都算係朋友嚟嘅，大家so far都辛苦咗一套劇，3個幾4個月嘅時間都係一齊辛苦嘅，我唔知道佢係有啲咩目的所以要咁做，但係都唔緊要啦，其實好多觀眾同讀者都係好雪亮嘅！」

問到楊明有否聯絡過對方，他說：「冇喎，新聞出咗街之後，呢個群組刪咗，好多同事都覺得唔舒服，世界上有好多種人，每人都有唔同嘅目的，我唔能夠管理晒所有人，人哋要咁做都冇辦法。」另一方面，有報道指楊明入住女友莊思明位於山頂的獨立屋，似乎好事近，楊明說：「唔會閃囉，唔會突然間囉，會講畀大家聽嘅，而家實質嘅時間大家都冇諗嘅，開始去plan嘅時候會同大家講，大家都會知，唔會係秘密。」

-----------------------------
7月4日起 《蘋果動新聞》只限升級壹會員閱覽
繼續撐蘋果！