世界盃啱啱打完第一圈，雖然中國國家隊做咗三零部隊，但對於首次面對世界級強隊，算係雖敗猶榮。對於一啲真係鍾意睇波嘅球迷嚟講，今次真係無癮，事關好多場球賽喺全球嘅賭波熱潮下，出現太多嘅「爆冷」場面，好多有下注買「上盤」嘅球迷，都畀啲外圍莊家殺到片甲不留。有人話個股市咁靜，轉睇世界盃可以慳番唔少，呢句話未必一定啱。
唔經唔覺又到咗第二季尾，個市每次去到季尾嘅時候就好似中咗詛咒咁，盈富基金（2800）持續發售機制俾傳媒講到好似洪水猛獸，話啲大戶點樣推低個市嚟做套戥。不過講真嗰句，原本成件事就唔係咁大不了，但係就俾啲傳媒講吓講吓，將成件事誇大到無人有，就好似話世界盃拖垮港股咁誇張。其實搞成咁，都係有班人揸住任總一句話，話希望今年內可以將手頭剩番嘅官股完全出售，搞到好似一定要沽晒嚟埋單咁，結果就為港股帶來好多不必要嘅障礙。