本地華資企業接班人當中，新地（016）大股東郭炳江阿仔郭基煇（Adam）近期曝光率都算高，佢仲應該好快變成傳媒甜心，事關佢每次現身都有問必答，噚日自爆計劃同恒地（012）合作興建邊境購物城之外，又用唔少時間講爸爸嘅情況，感性地話好想抱一抱佢。

書信溝通　每一封都珍貴

新地連續第五年舉行長者盆菜宴，以往呢項活動由郭炳江主持，佢𠵱家因貪污案入獄，就由佢阿仔Adam上陣。佢哋噚日喺馬灣挪亞方舟筵開七十三席，招待近千名來自九龍城區嘅長者。
可能諗起呢個活動以往由爸爸主持，Adam喺台上台下都講咗幾次「好感觸」。佢話，𠵱家主要透過書信跟爸爸溝通，「收到每一封信都好珍貴」，因家書上面「每一個字都係心血」。
郭炳江喺最近一封信入面，就話要用一星期整頓申請保釋失敗嘅心情，同時引用著名基督教作者、小說《獅子．女巫．魔衣櫥》作家C.S. Lewis嘅名句：「God whispers to us in our joy, speaks in our consciences, but shouts in our pains. It is his megaphone to rouse a deaf world」（喜悅時神對我們耳語，對我們良心說話，困難時則對我們大聲呼喊，那是他喚醒世界的咪高峰），勸勉家人喺困難時候，要聆聽神嘅呼喊。
講到最尾，估不到Adam堂堂一個大男人，忽然好似細路仔扭計咁話「不知幾想可以同佢講個電話，或者抱一抱」！

李華華
mailto:[email protected]