森美同麥雅緻今日喺灣仔出席保險公司活動，森美嘅一對仔女已經開學，大仔已經過咗英國讀書，阿女都升中一嘞，森美話：「今年有啲失落，個仔第二年返英國，不過因為要開工送唔到機，係有啲忐忑，心係好掛住嘅，不過佢已經適應咗，係好事，個女都升中一，一對仔女都讀緊中學，好唏噓嘅，感覺佢哋長大咗喇，依家同老婆會一齊睇佢哋細個嘅片，唔捨得佢哋長大。」森美仲笑話最近收養咗兩隻狗，重拾養小朋友嘅回憶，佢話：「一男一女，當養返小朋友。」

森美仲笑話最近催大仔追女仔，佢話：「我成日問佢識唔識到外國女仔？佢話冇。我同佢講要識吓唔同國籍嘅女仔，擴闊眼界，唔好嘥錢嘛！我希望佢快啲戀愛㗎，早啲戀愛，等佢唔好睇得咁重，要開放啲去講，要學懂失戀，可以早啲同佢傾。」森美仲愈爆愈多，話個仔小六時同個女仔行得好埋，佢叫個女仔嚟屋企食飯，仲約埋對方家長見面，雖然冇繼續發展，但依家成為咗家庭朋友。

另外，麥雅緻都育有一對子女，佢爆老公張頴康好擔心個女早拍拖，依家個女只係4歲，但就成日有冇男同學埋身，相反，個仔就由佢跌跌碰碰，隨意好多。

精選娛聞，喺晒《娛果》
http://fb.com/appledailyent