黃夏蕙名下慈善基金最近捲入金錢糾紛，事件牽涉夏蕙姨嘅郭姓前契仔同舊愛感情轇輵，昨深夜11時許，夏蕙姨由另一位契仔楊峰陪同下，到灣仔警署備案。夏蕙姨接受《蘋果》電話訪問勞氣說：「我咁辛苦建立夏蕙慈善基金，只希望幫助有需要嘅老人，令佢哋老有所依，唔好利用我嘅名氣，做一啲傷天害理嘅事情。」

而昨晚夏蕙姨到警署前，由契女艾美琦陪同到佐敦出席晚宴，對於郭姓前契仔疑因私人感情糾紛，搞到連累「夏蕙慈善基金」名譽，夏蕙姨公開澄清，跟郭姓前契仔已脫離關係，強調自己基金沒問題，月前才獲政府資助80萬港元。夏蕙姨指因為經常幫前阿契仔唱歌，對方就拿二人廣告合照作拉扯，並好嬲話：「關我咩事，我又唔在場，我唔識個女人，佢哋係拉我落水。」

艾美琦就話知道事件立刻安慰契媽，仲搵咗律師幫手，夏蕙姨話：「奉勸世人男女關係要清楚，唔好亂，更千祈唔好牽涉第三者。」並讚契女艾美琦好乖，不會有雷同事件發生。

此外，對於好友吳君麗病逝，夏蕙姨表示：「之前知道佢有肺積水入院，但佢唔想畀人知，對上見佢係兩個星期前一個派對，君麗姐知我有個基金成立，仲話一定會嚟支持，之後就突然收到佢離世消息。」

精選娛聞，喺晒《娛果》
http://fb.com/appledailyent