夏天一係曬到暈，一係落大雨，通街烏煙瘴氣，其實好少機會開篷，JJ朋友A有晚開工做到通宵，見就快天光天氣唔熱，先開個篷爽爽佢，諗住吹吓生風精神啲無咁眼瞓，可能因為開咗篷，上落方便咗，惹嚟兩位靈界朋友坐順風車。

話說A臨天光行經出名有啲嘢嘅清水灣道，唔只覺得凉爽，仲寒寒哋㖭，最奇特係架車行緊，風應該由正面吹埋嚟，但後尾枕好似有人吹緊氣。之前講話兩位朋友，點解A會Sense到係兩位？因為佢聽到一問一答傾偈聲，人哋話鬼食泥咁聲，A嗰次聽得好清楚，女聲話：「不如搞搞佢，叫佢開快啲啦，就天光喇。」男聲答：「我咪吹緊佢囉。」其實未等男聲答，A已經踩快咗，一直唔敢望倒後鏡嘅佢，去到飛鵝山腳時終於忍唔住一望，好彩唔係六目交投，佢見到嘅，只係兩對腳，踩住佢後座張梳化，仲要係着唐裝衫，你都咪話唔驚，嚇到佢之後唔敢再望倒後鏡，速速踩油入市區。
我想問，唔係話鬼無腳嘅咩？聽完呢個古仔，喺農曆七月夜晚，你又夠唔夠膽開篷先？

文：嘴嚼爺