范太去馬！八方知道范太只係話開始考慮是否選特首，同其餘兩個特首熱門候選人唐英年同梁振英一樣，家仍然未宣佈「入閘」，但唔代表特首跑馬仔遊戲未開始，三個人近日隔空交手，真係令人目不暇給。

范太未真正落場，不過喺馬場上真正跑馬仔就好快有得睇，事關佢同兒子范駿華一齊養嘅新馬，已經改咗名叫做「自成一格」（英文名：Oneofakind），暑假過後，新馬季應該好快可以出賽。范太幫新寵改名做「自成一格」，當中有冇微言大義、以此明志，真係范太自己先知，可能佢思前想後，覺得同兩個最大對手比賽，自己喺愛國愛港、民望同能力三方面都自成一格。
范太做馬主多年，之前又係同兒子合夥養過隻馬叫「另具一格」，先後入過胡森、鄭俊偉馬房，贏過五場頭馬，總獎金逾430萬元；新買入呢匹「自成一格」，周歲價只係10萬紐元（約64萬港元），同好多大馬主大手筆買馬比較，可以話貫徹范太一向嘅作風，就係不盲目追求名牌名氣，唔會見貴就買，更加唔會唔貴唔買，同佢從政一樣，十分理性，八方知道「自成一格」會交畀練馬師葉楚航訓練。
范太本身貴為馬會大董，如果特首跑馬仔勝出登基做下任特首，政務繁忙，相信不能兼任大董，要讓番個位出嚟，會唔會繼續做馬主呢？上面話香港97後馬照跑，舞照跳，雖然老董同煲呔都唔係馬主，范太想點，暫時唔知，如果唔做馬主，乖仔做一樣啫。

梁振英唔係馬主，八方印象中佢罕有現身馬場，唐英年做馬主多年，養過逾10匹馬，又曾與前政務司司長許仕仁合養馬匹，去唔去馬，真係要同肥龍商量吓先o架。
mailto:[email protected]