潘明輝今期（11日）受歡迎程度不下於莫雷拉，來到季尾，十磅優勢不由否定，巫顯東頻贏已是證明。小潘今期騎數匹不錯的超輕磅邊線馬，借助他十磅提升競爭力。

第二場五班泥地1200米，泥地偏差利放的話，潘明輝「衝鋒友」孭住105磅（計超兩磅），排三檔，若慢閘或唔肯放無佢符，假若出閘快肯搶，同場116磅「好友心」也讓牠11磅，掛頭牌「好準確」讓28磅，是否一定追到佢？

從來都不喜歡「衝鋒友」，講牠缺點講到厭，慢閘、韁口差，與其脾氣有關，力短則是其能力問題，記憶中有揀牠入範圍，一次起兩次止，無理佢好耐，今次鬼迷迷畀佢引到，純粹因上述觀點，同場快馬不多，望場地利放，最重要是估計會有分頭，才引到我小注博一博。

同場「好準確」落五班肯定有著數，只是排八檔，加上是熱門，買Q才諗。「有福氣」上次表現失常，莫雷拉肯再騎，四檔可前置，會加入。「踏雪名駒」復課持續受壓，交到上仗水準夠爭。「保羅威威」、「金錢炮」及「大收成」近況俱不錯，只覺外檔難發揮。