有名你叫股壇小辣椒，胡孟青係咪由細到大都咁辣？「我由細到大都係有嗰句、講嗰句喎」，50歲嘅佢憶述少女時代喺嘉諾撒聖瑪利書院讀書時，試過因為講心嗰句得罪同學，但大家冇隔夜仇，好快冇事咯！
青姐雖然係股評人，但細個原來想做娛樂記者，「嗰時成日買娛樂雜誌嚟睇，覺得個世界同自己嗰個好唔同，冇咁悶」；但咪以為佢咁八卦冇乜文青氣息，青姐中學時屬中文學會，搞過讀書會，「我成日都刨張愛玲、亦舒同李碧華㗎」。
鍾意睇課外書唔等於鍾意讀書喎，除咗小一考過10名以內，其他時候都係20名左右；中學時最鍾意嘅科目係西史，「以古鑑今，學到好多嘢」。青姐越大越對經濟有興趣，報考港大讀經濟但名落孫山，之後加入銀行界，做咗兩年嘢後索性去英國列斯特大學讀經濟。

湯碗頭老竇傑作

青姐係大家姐，細個成日同兩個細佬癲埋一份，試過合力叠高凳仔，由細佬爬高偷糖食，「結果個凳仔陣解體，細佬連人帶裝住糖嘅玻璃樽仆落嚟，即時叫救命」。有日有隻白鴿飛咗入屋，姐弟一齊去捉，「嚇到隻鴿周圍屙屎」，最終捉到佢，「夜晚食飯就見到有煲白鴿湯……」
青姐仲自爆自細有位御用髮型師，佢細個嘅湯碗頭就係爸爸嘅傑作，媽媽則係佢嘅時裝設計師，「用衣車車咗好多衫畀我」。