曼聯新兵盧卡古周一出席球隊開操，第一次同新隊友見面，但佢最令隊友留下深刻印象嘅，可能唔係佢嘅球技，而係佢對鞋！曼聯中場桑馬達試着盧卡古對鞋，之後將相放上社交網站，佢感嘆：「歡迎盧卡古！係我見過最大嘅鞋！」之後馬達仲將自己對鞋拍埋去比，大細真係差好遠。盧卡古喺網上見到馬達嘅post，以笑喊嘅表情符號作回應，睇嚟佢同新隊友相處得幾融洽。據英國傳媒報道，盧卡古着開48號鞋。