上個禮拜喺阿根廷舉行嘅G20習特會，終於達成咗中美貿易戰停火90日嘅協議。呢幾日好多外媒都咁樣形容，侵侵只不過係將個「死刑」延期執行，睇下強國係咪淨係識開空頭支票。點知噚日又爆咗單華為太子女因違反美國對伊朗嘅制裁令而喺加拿大被捕，令中美貿易戰更加複雜。撇開華為單嘢唔講住，其實侵侵畀90日個期出嚟呢招好狠毒，根本係逼習帝「今日的我打倒昨日的我」，要佢放棄搞國家資本主義，改為全面擁抱市場經濟，所謂嘅停火協議，似係最後通牒多啲囉！

好多人都覺得，由上個禮拜六起計嘅呢90日，根本唔足夠解決中美兩國長久以來累積嘅矛盾。即使兩國官員會繼續談判，但最大問題其實喺強國呢邊。喺習特會之前，美國提出嘅52項要求，俾中國細分為142項，當中有40%係關於市場開放、知識產權保護、強制技術轉讓、非關稅壁壘、網絡入侵和網絡盜竊等方面嘅結構性改革。就咁睇都知，呢啲要求其實仲牽涉埋強國嘅科技發展同軍事國防政策，邊啲明做邊啲暗做，大家心照啦。有評論就話，強國早喺當年加入世貿嗰陣已經承諾咗要進行呢啲改革，之但係搞咗將近18年，都係無咩大進展，背後原因莫過於強國裏面盤根錯節嘅利益關係。就憑呢90日，可以搖動背後嗰啲紅色權貴同利益集團？唔好講笑啦！

對於習帝嚟講，呢90日都應該幾頭痕，要佢放棄國進民退、放棄政府對經濟施加嘅龐大影響力、放棄喺企業裏面搞黨組織、放棄補貼國企，建立公平競爭嘅市場營商環境，即係要佢推翻自己嘅權力基礎，形同自斷右臂。不過，正所謂「出得嚟行，始終要還」，就好似曾任中共中央黨校校刊《學習時報》副總編嘅中國問題專家鄧聿文，日前喺《紐約時報》撰文咁講，中美貿易戰本質上是自由資本主義同國家資本主義嘅較量，係「遲早要來」嘅事。之不過，習帝過去嘅所作所為，令美國精英階層對中共同佢徹底失望，甚至意識到必須出手遏制強國繼續走向國家資本主義呢條道路，否則後患無窮，結果就喺呢年同強國喺貿易問題上開拖。

習帝要同侵侵力撐到底，還是要讓步，真係一念天堂一念地獄？抑或係點樣做都不會好過？事實上，全世界嘅媒體都𥄫實，中共會唔會喺本月18日，亦即揭開當年改革開放序幕嘅十一屆三中全會召開40周年當天，作出重大宣佈。甚至有評論認為，單單睇呢日，就知中共會如何回應侵侵嘅最後通牒。之前有傳，中共唔會大肆慶祝呢一日，而過去多次嘅改革開放紀念活動，都出現「去鄧抬習」嘅現象，究竟習帝會唔會嚟個「華麗轉身」，放棄同鄧家嘅恩怨，由「崇毛」變番做「尊鄧」，全面擁抱改革開放嘅道路，而唔係再用進入咩咩「新時代」嚟故弄玄虛，真係好戲在後頭。

呢場大龍鳳，中共應該會做得好好睇睇，之但係咁就可以呃到美國人，似乎天真咗啲囉。習帝呢一關真係唔易過，搞得唔好，分分鐘中美出年真係埋牙，由冷戰變成熱戰，真係天曉得？

花生蘋論員