當年今日

701收料站:光通數網蠢蠢欲動

蘋果日報 2002/01/07 00:00


近排美國科技股飆升,連帶香港唔少創業板股份都借頭借路炒一餐,最難得係有人跟風。
靚女經紀話,近排唔少表面上係科技股嘅股仔,都想話趁勢炒作,例如仙界經典之一嘅光通數網(155),最近市場傳出將會有動作。
光通數網去年中都曾傳過想炒作,收尾變成發行可換股債券。傳統智慧教落,債券持有人好多時候一見股價上升,就會即刻換股沽貨,或者係咁,所以光通數網嘅股價炒唔起並輾轉回落,其後股份重突然間由1拆2,股價就更加一沉不起,喺1至2仙之間徘徊多時。
據聞唔少揸重貨嘅大戶,以往一提起光通數網,面色都唔多好睇。不過,靚女經紀話有關人等近期轉咗口風,好似話同最大嘅大戶講掂數喎。
光通數網上周有一日突然急升,之後在2仙水平流連,上周五收2.1仙。本周可以望多陣至決定上唔上車。