亞視繼《亞視百人》後，再搞《亞姐百人》，最近更搵番一班N年前嘅亞姐亮相接受訪問。今日就請嚟同譚玉瑛一樣有「不老症」，當年喺亞視亦係做兒童節目主持出哂名嘅「潔儀姐姐」袁潔儀，另一個就係跳舞出身又搞學校嘅孫名翠，不過佢依家已經改名叫孫譽文。

潔儀姐姐望落仲係好後生，佢三年前已經嫁咗去廣州做煮飯婆，佢笑住話：「我老公耕田，做有機耕種，都唔易做，上面啲人唔識，最緊要平。」潔儀姐姐喺廣州長住，對於內地爆發H7N9禽流感，佢話唔理得咁多，只係做埋老公個阿媽，日哦夜哦叫佢記得經常洗手。

孫譽文就享受做個女強人，7年前讀完珠寶鑑証，即刻做埋珠寶設計，開拓珠寶生意，今日仲戴住自己設計嘅過百萬鑽飾。