麥嘉、石天、黃百鳴，新藝城三大巨頭，仲有「大腦」施南生、泰迪羅賓，今晚齊集會展，賀志偉牛一。佢哋仲齊齊上台，送咗個「奮鬥」牌匾畀志偉做生日禮物。如果徐克都喺度，就好喇。

點解要送「奮鬥」牌匾？當年——已經係1980年左右，新藝城影業創辦，當時前身係金公主院線屬下嘅「奮鬥公司」。創辦人係麥嘉、石天同黃百鳴。其後新藝城決定擴展業務，所以請來徐克、志偉、泰迪羅賓同施南生加入，成立「奮鬥房」七人小組，呢個「奮鬥房」就係位於石天美孚嘅屋企，度出不少佳作，包括當年喺暑假推出《鬼馬智多星》同《追女仔》兩大猛片，以振聲威，結果大收，更首次壓倒嘉禾同邵氏兩大陣營，亦揭開新藝城光輝一頁。

順帶一提，當年志偉首部新藝城電影，係《追女仔》，麥嘉導演，張天愛、石天主演。至於志偉首部導演嘅新藝城作品，就係82年嘅《最佳拍檔》。

難得喺志偉嘅生日派對上，呢七個巨頭可以共聚一堂。港產片光芒一頁，彷彿又活現觀眾眼前……