教宗本篤十六世正式同信眾say goodbye，佢嘅位由邊個接任眾說紛紜，不過可以肯定嘅係，科大經濟學系教授雷鼎鳴會係喺湯漢樞機以外，最先同新教宗近距離接觸嘅香港人。唔通雷教授係虔誠教徒？非也，原來係教廷一個委員會睇中咗雷教授嘅學術成就，嚟緊5月23、24號請佢過去參與一個有關就業問題嘅會議，之後仲有機會同新教宗會面㖭。

儲落唔少梵蒂岡郵票

雷教授收到八方電話好驚慌，話想保持低調唔想沾咗教廷光，又謙稱自己只係芸芸講者之一。不過佢就透露呢個委員會溝通方法好特別，一直以嚟只係書信往來，「你覆咗佢呢，佢又唔係好回，隔幾個禮拜又突然回㗎喎」。不過佢就因為咁，儲埋咗唔少梵蒂岡靚郵票。
見慣大場面嘅雷鼎鳴仲話未準備發言內容，𠵱家最擔心係唔知用乜嘢語言講，事關主辦機構個名、網站同往來文件都係拉丁文，「我assume我係用英文講啩，用拉丁文我唔掂㗎喎」。本身係華仁仔嘅雷公，原來細過都學過吓拉丁文，仲幫教會做過中英傳譯工作，雖然唔係教徒，但同教會好有淵源。