曼聯今季勇奪歐霸盃同英聯盃雙料冠軍，下季仲有得踢歐聯，今夏積極擴軍，好似C朗、艾華路莫拉達等猛將盛傳加盟，現役球員亦都擔心地位不保，好似人工又高建樹又少嘅「月巴」朗尼。好到呢位隊長都終於生性，據報周二已經到曼聯基地展開新一季練習，比其他隊友早足足兩星期，睇吓領隊摩連奴會唔會被朗尼感動到嘞。

除咗球會，連英格蘭國家隊，朗尼近年嘅重要性都直線下滑，連隊長位置都不保，不過月巴都好識做，周一夜晚場U21歐國盃，小英兵以2:1反勝斯洛伐克，朗尼仲抱住仔仔一齊睇電視直播，相信都加番唔少印象分。