丹麥樂隊Michael Learns To Rock（MLTR）憑經典名曲《That's Why (You Go Away)》在港紅極一時，當年歌曲多得大台劇《壹號皇庭》播到街知巷聞，帶挈樂隊喺東南亞各地都大受歡迎。

MLTR近日再度來港，噚晚更在颱風吹襲下假九展Star Hall開騷，歌迷冇受「天鴿」破壞睇騷心情，亦有不少圈中人捧場，包括許冠文、鄭世豪等，盧敏儀同老公孫敬安亦有拍拖睇騷，而車婉婉都有同老公到場，婉婉笑言餵飽囝囝先出嚟，自己都未食飯，仲透露混血B仔4個幾月大已經出牙，因為早咗出牙，令佢好大打擊，對於之後復工都擔心會唔捨得，明白媽媽唔捨得放棄餵母乳，所以嚟聽歌平伏心情，佢又稱自己仲有10磅要減，開工仲要餵母乳，依家正想緊辦法。

MLTR嘅九展騷於8時許開場，主音Jascha Richter整晚都出招冧港迷，仲話：「我哋愛香港。」其間唱到昔日歌曲時，台下歌迷都一同和唱，當唱至《I'm Gonna Be Around》時，Jascha同隊友竟然行落台，有熱情女歌迷上前送抱，佢仲一度邊唱邊坐在觀眾席。其間，MLTR請來新人楊斯捷（Phoebe）上台合唱《Eternal Love》，之後又獲得二胡演奏家霍世潔伴奏，演繹《一無所有》英文版《I Walk This Road Alone》，還有獻唱改編自張學友名曲《吻別》嘅《Take Me To Your Heart》等，台上仲播出當年來港表演嘅珍貴片段。唱到encore，三人再次登場唱出《Someday》，最後唱出代表作《That's Why (You Go Away)》掀起全場高潮，台下歌迷亮相手機燈及一同大合唱。

另外，盧敏儀與孫敬安笑言睇MLTR演唱會來增進感情，又希望可以參考吓人哋點搞演唱會，孫敬安仲提起老友黎明早前嘅廣州演唱會收唔到幾百萬製作費，盧敏儀大讚黎明最後都照唱十分專業，孫敬安補充：「佢(黎明)遲啲會去深圳、武漢，今次已收晒錢。」叮囑對方唔好信啲細公司，信譽好緊要。