童愛玲、朱慧敏、張學潤會喺二月主演舞台劇《金星撞火星》，呢套劇係改編自當年電影《等愛的女人》，童愛玲飾演電影中葉童嘅角色，朱慧敏則演出吳家麗嘅角色。

童愛玲飾演外表強，內心好需要愛嘅高層，識咗個細十年嘅富二代拍拖，佢話現實中就接受唔到，亦冇試過姊弟戀。當年張智霖有份主演《等》電影，童愛玲話：「如果Chilam願意演係個好綽頭，我嘅男對手仲搵緊，要搵位高過我男士。」角色背景跟童愛玲相近，講一個女人台灣來港，操一口唔流利廣東話，童愛玲話：「我第一次做舞台劇，導演好大膽搵我，我都問佢唔驚我廣東話唔正咩。」

童愛玲囝囝已十四歲，擔唔擔心阿仔會同比自己大姐姐拍拖？童愛玲話：「年齡唔係問題，我都想佢有對象，咁會成熟獨立啲，阿仔依家性格仲好細路，好黐屋企。」童愛玲稍後會一家到日本滑雪過節，不過佢之前腳傷三條靭帶，仍未完全康復，今次要特別小心。農曆年就會返台灣過年，做孝順女，自從台灣來港廿幾年都一如以往。

朱慧敏同王賢誌演情侶，冇親熱戲，自從喺內地做過舞台劇《我和春天有個約會》後食過返尋味，首次喺港參演舞台劇，朱慧敏話稱得上完成夢想。聖誕節佢會閉關自己喺家過，佢仲話依家冇拖拍。

更多娛聞，喺晒《娛果》
http://fb.com/appledailyent