當年今日
關於我們

若非緋聞所害已拍拖
郭羨妮對子華最有Feel

蘋果日報 2002/03/10 00:00


現年二十七歲的郭羨妮(Sonija),由空中小姐搖身一變成為受無綫力捧的當家花旦,出道兩年多來被封緋聞皇后,先後與古天樂、黃子華及谷德昭等人拉上關係。Sonija坦承對子華很有feel,可惜未有進一步發展已被傳媒唱散,至於古仔,她僅奉上一句「NotMyCupofTea」(意譯:不合我的口味)。
愛情篇--愛子華才氣
郭羨妮(Sonija)成為九九年港姐冠軍後,至今出道兩年多,已迅速成為無綫當家花旦之一,隨着知名度提升,追求者亦漸增。去年Sonija宣布與空中少爺男友的一段情結束後,便先後跟古天樂、谷德昭及黃子華等人傳出緋聞。

擇男友重內涵
Sonija說:「我好怕啲人用緋聞皇后嚟形容我,出道兩年幾,傳過三次緋聞,唔算係好多。上年我同男朋友宣布分手,主要原因係我入咗娛樂圈之後,自己識嘅嘢多咗好多,開始發現同佢喺好多方面唔夾,所以我就主動同佢提出分手。
「𠵱家我都未搵到一個可以同我穩定發展感情嘅對象,其實我搵對象嘅條件真係好簡單,最緊要思想方面可以溝通到,對方唔一定要大富大貴或英俊不凡,我愛男友有才氣多於一切,物質對我嚟講唔係咁重要。」

肥谷只是朋友
去年Sonija與黃子華合演電影《一蚊雞保鑣》時,曾傳出二人日久生情,Sonija更數度留宿子華家中,難道Sonija就是因欣賞子華的才氣?
「我根本都冇去過子華屋企過夜。有時我覺得藝人同藝人之間,要發展一段感情唔係咁容易,好多時段感情未穩定,大家開始有啲feel想進一步時,已經俾傳媒唱散。我承認係好欣賞子華同谷德昭,肥谷就一定知我對佢冇feel,所以我哋真係好朋友關係,時不時會聯絡吓,講吓人生,講吓拍戲嘅嘢。
「至於同子華嘅關係,我哋啱啱開始有啲feel,但雙方未有進一步,已經俾人講成咁,大家都會好自然咁卻步啦!
「至於我另一個緋聞男友古天樂,雖然啲人傳到好似真嘅一樣,但我同古仔係兩類人,佢完全唔係我杯中嘅茶,唔係咁feel。古仔份人太情緒化,記得陣同佢拍」
渴望尋獲真愛
Sonija不諱言很渴望找到一個愛自己的新男友,她說:「我都知道要搵對象冇得心急,我又唔會主動去追求男仔,始終都要有番啲女性矜持。做我哋呢行,圈子好窄,工作時間忙,唔好話識男朋友,識朋友都難,所以𠵱家我啲好朋友都係圈中人,好似肥谷、林保怡、陳琪同唐寧就同我最傾得埋。
「如果我當對方係朋友,我就冇乜保留,可以講我係好容易信一個人,所以特別容易受傷害,俾朋友傷害嘅話,我會好傷心,不過我就唔係一個易喊嘅女人。記憶中喺十八歲嗰年,我同初戀情人分手,受咗好大打擊,我就喊咗幾場,學業又一落千丈,心情要好耐先可以平復。」

事業篇--妒忌楊思琦
郭羨妮在娛樂圈發展初期,她自言極不適應,因為做任何事都好像被人監視,而且因為她受無綫力捧,有些女藝員對她頗為敵視。

出道曾遭排斥
「初時我都唔知點解,我同公司啲女藝員撞到,咁禮貌上我會同對方打個招呼,點知對方竟然好不屑咁擰歪面,連一啲同我合作過拍劇嘅女藝員都係咁。
「其實嗰啲對我敵視嘅藝員唔鍾意我,只係出於一時妒忌心,佢哋嘅心情我可以理解,所以我唔會嬲佢哋,因為我自己曾經都有呢種心態。好似楊思琦(應屆港姐冠軍)選完港姐出嚟,公司對佢好重視,我都曾經有啲妒忌,但呢種感覺好快克服咗,因為每個人都有自己嘅角色,各有優點,冇必要同人比較。
自彈演技差勁
「啱啱入行嗰陣,我成日諗點樣可以快啲紅,但做咗呢行兩年幾之後,個人成熟咗,反而冇咗呢啲急進諗法,反而會諗吓點充實自己,睇番自己喺《尋秦記》嘅演出,真係做得好差,可能因為冇受過正統嘅演戲訓練,加上又第一次做戲,始終未識得點去掌握角色神髓啦!所以我得閒都會請教吓谷德昭,𠵱家慢慢都摸到啲演戲門路。」
Sonija表示雖然她對這個圈子有濃厚興趣,但並不想以藝人為終身職業。
「娛樂圈競爭咁大,有時一個藝人嘅去留,都未必可以由藝人自己控制,所以我一直有讀番書嘅心態,起碼將來唔做呢行,我有番咁上下學歷,要轉行都容易啲,所以以前喺加拿大讀大學,我都好勤力。」

家庭篇--在家千日好
郭羨妮十八歲在港完成中五課程後,舉家移民加拿大。讀完大學後她當上頭等機艙空中小姐,專門負責加、港航線,後來她當選港姐,舉家又為她返港定居。

兩年數度搬屋
Sonija說:「我哋一家人返嚟香港定居之後,阿哥自己搬咗出去住,我就同媽咪租咗太子道一個千呎單位,同三隻狗一齊生活,而爹哋就去咗內地做生意,所以只剩番媽咪照顧我。媽咪唔知係咪怕悶,定係太過關心我,所以好多時我去開工,媽咪都鍾意陪埋我一齊。」
Sonija似乎有搬屋癮,出道兩年已經數度搬屋,現時最大心願是置業,有一個屬於自己的舒適安樂窩。
夢想購安樂窩
「我雖然係好想買樓,但買樓嘅錢唔少,我𠵱家冇咁多錢,為咗買樓我會努力搵錢。平時如果唔使開工,我都係逛吓書局,又或睇吓戲,好多時都會留喺屋企,所以一個舒適嘅居所,對我嚟講都幾緊要。」

後記:
郭羨妮其實很適合在娛樂圈發展,因為她聰明、有野心,若好好磨練演技,發展肯定可以更上一層樓。筆者很怕一些藝人出出入入時,都要有幾個助手隨身。Sonija接受訪問當日,只有母親陪伴身旁,每事親力親為,確實少了一份架子,多了一點親切。
撰文:陳月媚 攝影:仇志德 協力:何國豪