曾經喺劇集《巾幗梟雄之義海豪情》飾演宮崎隊長、有綠葉王之稱嘅楊證樺（Man），因為領養問題而捲入風波，惹來唔少愛狗之士激烈討論。事緣今日有讀者向《蘋果》報料，指楊證樺喺2014年領養一隻狗BB，不過最近小狗不知所踪，於是惹來棄狗疑雲。

根據讀者提供嘅資料表示，有一個狗義工，喺fb留言稱喺2014年同幾個義工救咗幾隻狗BB，當時楊證樺認領咗一隻，仲改咗名叫Lucky，本來對方一直update狗狗嘅近況，但係近年已經冇聯絡，加上有第三者向佢透露，楊證樺已棄養Lucky，仲將佢棄於狗場，於是向對方了解，之後佢多次用whatsapp向楊證樺聯絡。

喺對話當中，楊證樺承認冇再養Lucky，不過佢否認送咗Lucky去狗場，只係將Lucky交咗俾一個同村兼有一個大花園嘅朋友收養，呢個狗義工話多次向楊證樺要求探訪，但係一直冇回覆，喺再三追問下，楊證樺回覆話Lucky仲住喺大花園嘅朋友屋企，仲send咗兩張Lucky嘅相，但係狗義工堅持要探望，結果楊證樺因工作關係，遲遲未有安排，所以狗義工喺fb留言，希望大家提供狗狗嘅新消息。

雖然狗義工再三強調Lucky係咪喺狗場有待證實，但係已經有唔少愛狗嘅網民留言鬧爆，有人直斥楊證樺不負責任，鬧佢係二打六博上位，甚至作出人身攻擊，當然亦有人撐楊證樺，其間楊證樺曾經留言表示清者自清，唔需要解釋任何嘢，佢亦否認自己避見狗義工，只不過係工作太忙，所以配合唔到，即使有人留言知道Lucky嘅下落，0依家生活得開心，依然平息唔到風波。

噚日下晝狗義工留言話已經知道Lucky下落，同時亦聯絡到新主人進行家訪，最後喺fb更新狀況話：「今日中午我同一位女義工去探Lucky（而家改咗名叫billy女），見到佢現時生活唔錯，走動地方非常大，絕育攞牌各類預防有做足。」佢仲話喺啲街坊口中了解過，Lucky嘅主人好錫佢，仲知道楊證樺間中都有探望Lucky。

最後狗義工話：「雖然佢做唔到『一生不離不棄』，但總算有盡力為佢找好人家，冇把Lucky隨便處理，佢最大不足只係對義工欠缺交代，但這罪不致受千夫所指，希望大家對佢嘅責備可以到此為止。還有，禍不及妻兒，呢個post無論如何都對楊生身邊人，尤其佢太太和妹妹做成傷害，我必須就此對她們公開致歉！」

楊證樺回覆傳媒，佢話：「其實我一直都希望可以帶義工見狗狗嘅新主人，不過時間上夾唔到，自己亦都處理不當，所以先引嚟呢場誤會，大家嘅出發點都係為咗狗狗嘅幸福，0依家件事已經解決，希望可以告一段落。」