離婚兩年嘅黃心美有第二春，日前喺社交網貼拖手相放閃，前晚心美風騷現身天際100，出席FOX+登陸香港記者會，被問到戀情表示：「公開感情係因為將心比己，拍拖唔想對方收收埋埋，安全感唔只女人需要，男方都要。我哋拍咗好短時間，但過咗三個月試用期，佢係圈外人，好男仔、好孝順，鍾意小動物，亦都對我好好。」

紅姐恨拍拖

心美感情有着落，同場嘅57歲惠英紅坦言恨拍拖：「十幾、二十年冇拍拖，都冇人追。」問到係咪畀人感覺太打得？紅姐話：「以前都有人咁講，但識落我好女人，唔只煮飯得，琴棋書畫、針線、織冷衫都識，按摩師牌我都有。」紅姐否認要求高，總之四肢健全就得，但唔鍾意小鮮肉，因為佢想做波斯貓被照顧，仲話曾經有朋友做媒人：「但我嫌太老囉，七十幾八十歲嗰啲真係唔得，總之大家思維要接近，我鍾意羅拔迪尼路（Robert De Niro）嘅類型。」
吳鎮宇最近中港兩邊忙，問到囝囝拍完《爸爸去哪兒》真人騷後，有冇話想拍戲？鎮宇表示：「咁又冇，冇乜必要都算啦，主要係冇人搵，要等佢放暑假先得，唔可以告假，最緊要過媽咪嗰關，唔係好關我事。」
撰文：馮仁昭