梁漢文、楊恭如和李彩華前晚在灣仔出席晚宴，梁漢文表示正斟談BigFour巡迴演唱會，暫定6月1日在澳州舉行，12月則會到美加演出。
談到Sa基婚變，梁漢文謂曾傳短訊慰問鄭中基，他說：「叫佢有需要可以搵我傾偈，呢一刻唔使講太多，佢明白我哋支持佢。」問梁漢文平時鄭中基可會找他談心事？他說：「《美女廚房》時傾多啲偈，但好少傾心事，佢唔傾感情，希望佢兩個努力工作啦。」

楊恭如自爆有追求者，但要待了解才知有否發展機會，問她會否閃電結婚？她說：「唔知，但我冇秘婚，你哋唔使咁辛苦摷。」結婚會低調嗎？恭如說：「保密有保密嘅好處，但我結婚大方會認，我冇咁叻，瞞唔到。」談到Sa基婚變，恭如說：「好可惜，應該畀多啲時間大家考慮清楚。」
此外，詹瑞文昨日在科技大學舉行講座，最近他不時與阿Sa宣傳新片《美麗密令》，對於阿Sa和鄭中基離婚，有指阿Sa與內地富商交往，問詹Sir是否相信？他說：「我最關心係阿Sa嘅心情同埋佢嘅未來同事業，如果佢想搵人傾偈可以搵我。」

採訪、攝影：王連連、陳慧安