何超蓮成立嘅義工團體Smile with us HK，今日去到薄扶林村，同一班小朋友學習製作舞火龍，而且仲準備咗月餅同生果派畀一班村內嘅長者，超蓮喺製作火龍嘅師傅指導下，仲嘗試拎起龍頭去學點樣舞火龍添，超蓮話：「自己都係第一次接觸舞火龍呢樣傳統，覺得好新奇有趣。」

嚟緊中秋節超蓮話會提早同屋企做節，然後正日會同義工們喺街頭派發一千個月餅，另外會喺11月19號同海洋公園合作，送出九百張門票招待傷殘人仕、長者同基層小朋友去海洋公園玩，超蓮話自己到時都會落落手落腳帶小朋友一齊玩。

工作排得密密麻麻，咁咪冇時間俾你啲兵仔？超蓮話：「冇兵呀，我o依家塊面圓晒冇晒兵，因為食咗好多月餅，我唔鍾意做娘娘，做娘娘太過養尊處優，寧願做宮女，我先得廿幾歲應該做多啲有意義嘅嘢，唔好掛住拍拖，想專注多啲喺事業上面，所以先成立smile with us。」

超蓮又話啱啱先喺河北做完慈善探訪，跟住又飛澳洲出席自己嘅酒店項目，跟住就即刻再返嚟：「媽咪都話我掛住做嘢，屋企嘢都冇乜點理。」問到媽咪冇催你拍拖咩？佢話：「佢唔得閒理我，淨係掛住照顧屋企啲貓仔。」

講到近來網上有一個叫ICE-CREAM CHALLENGE慈善活動，透過蒙住對眼食雪糕，令更多人關心同幫助導盲犬，講到超蓮都會挑戰，佢話：「係呀，我一陣都約咗JW一齊互相餵大家食(雪糕)，我哋喺度講緊要食得污糟啲，拍出嚟先好笑好睇，到時都會放上網同大家分享。」

活動挑戰完畢後要再Tag三個朋友，超蓮有咩人選？佢話：「一定有阿G.E.M.同阿Sa囉。」咁緋聞男友楊政龍呢？佢話：「因為呢個活動係想多啲人關心留意幫助導盲犬，所以應該得搵番藝人朋友會好啲。」咁另一緋聞男友方力申呢？佢話：「佢已經畀人Tag咗，冇得再Tag啦。」