【搵錢頻撲】趕返港陪囝囝過中秋 胡杏兒:希望兼顧好工作同家庭
湖南衛視胡杏兒中秋節
胡杏兒接受湖南衛視邀請,噚日到長沙銅官窯出席中秋晚會,一身古裝造型登場,獻唱《夢回千年》。杏兒話離港工作,最掛住寶貝囝囝Brendan,所以已預先為Brendan準備驚喜禮物,而演出完亦都第一時間飛返港跟家人過中秋節,佢話:「我希望可以同時兼顧好工作同家庭,所以預先買咗燈籠,令佢感受到中秋氣氛。而月餅就太油膩喇!所以等佢大個之後至可以食。」
今年中秋晚會要求加入古裝元素,所以杏兒就決定用唐代裝扮造型演唱,佢話:「令我諗起《那年花開月正圓》嘅清裝扮相,今次受到邀請着住古裝唱歌,其實我係好興奮O架!」雖然只係唱一首歌,但杏兒一身打扮絕不馬虎,化妝梳頭都用咗兩個半鐘,佢笑言:「難得嚟到古蹟附近拍攝,當然要影多幾張靚相,一身古裝造型特別覺得有詩情畫意。」
精選娛聞,喺晒《娛果》
http://fb.com/appledailyent