兩年前以貴絕將軍澳新盤姿態登場、帝國集團及麗新(488)合作發展的藍塘傲交樓，資深驗樓師詹濟南驗收項目首個單位，結果蝦碌百出，廚房鋅盆及廁所架銹跡明顯睇到、一屋四門兩道閂唔到，更離譜，企缸去水位石屎塞渠水去唔到，即使大位做好，細位分數幾乎無樣好，總分僅獲68分，低於一般業主可接受水平。

藍塘傲兩年前開賣首批折實均價約1.3萬元，樓價狂升，今日回望感覺抵，但當時首批均價卻貴絕將軍澳。事實上發展商2012年以每方呎地價4,929元投得，為區內地價最貴地皮，委聘著名則師樓巴馬丹拿及承建商協興建築興建，原定今年9月交樓，卻遲了一個多月交樓。

詹濟南驗收6座中層1房單位，實用437方呎，業主兩年前花約500萬元買入。未入單位，詹sir已發現大門門鎖鬆。入屋後，油漆地板靚，予人第一印象好。沒料瑕疵蝦碌排隊出場，露台聽到空心磚，外牆3塊，客廳窗外邊皮位又1塊，暫未有飛落街危險，但必須處理免生意外。

睡房相連平台無大意外，但設計可望返單位廁所，突然傳來徒弟康仔在廁所大叫：「大件事!」單位房與廳之間有例牌房門之外，房間一邊牆身與廁所之間設趟門，經趟門走進廁所，先發現趟門鎖壞，再看淋浴間去水位，竟然被水泥近乎封死，用近乎形容是因為尚餘幾毫米直徑窿仔，放幾秒水奢望沖走水泥？卻已成水氹。詹sir認為是清潔工人倒英泥所致。

退後一步望浴室門，應有兩條門邊膠卻漏掉。轉身再望，見廁紙架銹跡食到好深，無法捽甩。步出廁所，想閂廁所門，但詹sir出盡九牛二虎之力，卻仍閂不倒，「一屋4門，1個鎖鬆，兩個鎖壞。」行出與廳相連的開放式廚房，鋅盆同樣發現到銹跡，用料質素可見幾差。詹sir稱，單位表面好似好靚，但陰暗位多蝦碌，同樣由協興建築承建的同區新盤Savannah細位無蝦碌，反而大位手工無咁靚。

今個單位是詹sir驗收藍塘傲的首個單位，評分68分，帝國集團早年與長實合作發展的馬頭圍君柏評分亦介乎60幾至70幾分之間，間中有單位見「8」字頭，屬於一般業主可接受水平。首個單位交樓得分低，他認為，之後交樓得分會上升，事關今次單位出事主要是蝦碌，門鎖壞、企缸塞渠累到2項工種捧蛋，其他大位，包括油漆、批盪及來去水無問題，個底打得好。藍塘傲發言人回應，就該單位提出的意見會盡快跟進及處理。

美聯物業林志堅表示，屋苑已錄約7宗租賃成交，呎租由33至40元，其中5座中層H室，實用388方呎，月租1.55萬元，呎租40元，回報率近3.2厘。另外5座低層C室，實用404方呎，月租1.58萬元，呎租39元，回報率約3.3厘。現有約89個放租盤，其中6座中層G室，實用467方呎，叫租1.55萬元，呎租33元，業主2016年以近590萬元買入，預期回報率約3.2厘。

「今期樓行」直播驗樓網址︰ https://youtu.be/JL3XnaLc1PA

記者︰陳家雄
攝影：何耀勤

全球樓行 Dream House零距離
https://hk.feature.appledaily.com/overseasproperty