陳淑蘭（蘭子）早前於fb以「引狼入室」發文，指2016年仲引薦Crystal入佢男友利承武嘅飲食集團做嘢，但後來兩姊妹反目，真係說來話長，最初蘭子知道男友餐飲事業要改革，而Crystal喺飲食界好有經驗，所以蘭子就說服佢過檔，咁喺男友身邊多個自己親信都好，後來利承武真係請咗Crystal，的而且確改革後，餐廳生意係好咗，所以蘭子喺男友面前都係立功嘅。

之不過後來有人經常喺酒店飲醉酒鬧事，有好姊妹相勸，以免有流言蜚語傳入男友耳中，但有人唔講道理反而嬲咗好姊妹，結果失儀嘅事好快傳到男友耳中，結果成日嗌交成為分手導火線，從此冇乜來往。蘭子發文後，Crystal喺fb爆seed狂轟蘭子，話:「人格必須是你需要檢討的一個課程，朋友一大堆都被你嚇跑掉......跟你玩過、合作過的全給你出賣背後亂唱。」Crystal爆Seed後，蘭子就指會於自己節目同專欄到作回應，與及會保留法律追究嘅權利(相關新聞： https://bit.ly/2ly4FdM )。

今日蘭子終於喺專欄作出回應，專欄入面同樣未有指名道姓，佢以「狼人」來形容呢位前度朋友，文章一開首佢就話自己一手引狼入室，咁就叫做自作自受，佢話當初酒店易手，適逢「狼人」搬屋，喺撤離前兩星期，佢同另一個朋友喺酒店餐廳食嘢，友人離開後，「狼人」就拉住佢去到一個酒店入面其中一間預訂婚宴嘅房間，蘭子話「狼人」喺同事眾睽睽下話要乜、要乜，包括屏風、餐枱、果醬、銀壼及糖等，仲叫蘭子吩咐助手過兩日送去其家，然後再送去「狼人」屋企。

蘭子專欄再提到，當初沒有諗得太深，就照「狼人」意思吩咐助手，但助手就提醒佢，嗰啲嘢公司真係會唔要咩？一言驚醒夢中人，蘭子深感有被人利用嘅感覺，就打番電話俾「狼人」，仲話自己唔要嗰啲嘢喇，「狼人」當時即好緊張問蘭子係咪老闆知道咗唔高興，但蘭子就回答話如果老闆真係知道咗就可能會唔高興。之後蘭子從「狼人」嘅前男友口中得知，去「狼人」屋企食飯就好似去咗酒店咁，又有佢哋嘅共同朋友話會收到方送嘅物品同糖，而最後「狼人」亦預留咗一張枱俾佢，蘭子喺專欄到就話唔知係咪準備嚟擺佢上枱。最後蘭子話盂蘭節就到，希望做完呢場大龍鳳，笑言希望可以幫佢驅走邪鬼，仲話以後會帶眼識人。

而今日12點蘭子就會喺港台做節目，唔知到時會唔會再有啲咩新回應呢！

精選娛聞，喺晒《娛果》
http://fb.com/appledailyent