【瘋狂恥笑荷蘭叻】赴俄羅斯睇揭幕/決賽 阿倫撲世界盃黃牛飛
荷蘭叻ViuTV譚詠麟NowTV世界盃
四年一度嘅世界盃,將會喺6月14日踢揭幕戰,Now TV聯同ViuTV直播今屆賽事,今日先搵嚟好多明星、專業旁述造勢,又宣佈一系統遊戲節目,家庭觀眾都有份玩,可以爭巨額獎金。除咗直播賽事,仲會有好多節目,其實就有《Good Night Show全民星戰》將於下月30日播出,節目共33集,ViuTV送出逾120萬獎金由32位Viu TV藝人包括黃心美、黃奕晨、陳安立等代表32個入圍世界盃決賽周的國家,與不同嘉賓對戰。每集嘉賓會與4位 Viu TV藝人就不同國家特色的遊戲對戰,若嘉賓全勝的話可得4萬元獎金,若落敗的話,獎金會落入周未或周日Viu TV於戶外舉行、讓全港市民參與的有獎遊戲當中。
譚詠麟喺台上話睇好法國,活動後受訪就話,今屆時間好啲,唔使捱夜睇波,佢話:「今次時間好啲,冇咁夜,會拉隊睇開幕同決賽。」呢啲重要賽事有冇咁易買到飛?飛佢話:「密鑼緊鼓開始緊,盡能力啦,決賽緊張啲,已經炒緊。」佢話世界盃四年一次好期待,開幕同決賽將會係兩批朋友去睇。阿倫為世界盃造咗首歌《我們的夢》,喺活動上播咗少少片段,見到李克勤有份唱,阿倫就唱咗幾句俄文,佢話之後會搵番識俄文嘅人再錄一次歌。
阿倫為ViuTV同nowTV宣傳,亦話到明會上節目睇波:「睇波要柴娃娃先開心,旁述講一兩句,其他留番俾專家。」出名好支持荷蘭嘅陳百祥係大台人,加上荷蘭隊又入唔到決賽周,今屆喺nowTV同ViuTV播冇得主持節目,阿倫會唔會借呢個機會瘋狂恥笑「荷蘭叻」?阿倫話:「係呀,我哋大門永遠打開。雖然佢流TVB血,我哋自己人。」咁阿倫會唔會約小朋友睇?阿倫先喺遊花園:「幼稚園個啲?流感喎,放假喎。」佢再解釋話小朋友雖然好鍾意足球,但好忙要返工,唔會一齊睇。
黃心美受訪時話受爸爸影響鍾意睇波,但唔係鍾意碧咸:「我鍾意奧雲,覺得佢係family man,不過知道佢爛賭後,就鍾意咗C朗拿度。」會唔會同男朋友會睇波?佢話:「唔知男友睇唔睇波,所以未知,世界盃要同公司做節目。」佢又話近期多番幫公司開工,兩年會同公司傾合約,調整工作。
精選娛聞,喺晒《娛果》
http://fb.com/appledailyent
明星足球隊今日出席咗ViuTV同nowTV宣傳活動,阿倫話遲啲會上節目一齊睇波。
黃心美話唔知男友睇唔睇波,不過到時要幫公司好忙,未必有時間。