法國周二友賽贏俄羅斯3:1一役，賽後原來發生咗個小風波，搞到好好先生基奧特堅發嬲，而「元凶」竟然係有「新亨利」之稱嘅基利安麥巴比。

話說喺賽後採訪區，班記者原本捉住「銀河唯一」訪問，點知呢個時候，麥巴比就啱啱喺基奧特身後經過，而正訪問緊基奧特嗰位法國記者，好明顯被該仗梅開二度嘅麥巴比吸引咗，所以問緊問題嘅佢突然停頓咗，而基奧特梗係意識到，結果就爆咗一句：「你要行過去同佢講嘢嗎？咁你去啦！」然後就轉身離開。

不過，後尾班記者都係捉住基奧特同佢致歉，希望佢完成埋個訪問，而基奧特亦唔客氣咁再講：「我唔明，我同你講緊嘢喎，ok？」據講之後再有保羅普巴行過，而班記者都係職業病發作想望一望普巴，結果基奧特今次就直情捉住呢位中場隊友，同佢一齊離開採訪區。

-------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM