「佢老公想殺咗我！」姜濤爆花姐大鑊說。

「殺」是假，「嬲」是真。

人稱花姐的46歲黃慧君，本來只是ViuTV真人騷《全民造星》監製，去年節目成功捧紅姜濤後，被公司委派成為MIRROR和ERROR的經理人，於是乎，身兼經理人和監製兩職下，兼顧不了做人妻和母親的身份。

這天姜濤與經理人花姐接受《蘋果》專訪，花姐承認過去一年因為照顧MIRROR而令老公極度不滿。

花姐：「基本上我工作時間好長，好似噚晚咁，我開廠開到凌晨4點，我一返到去佢哋瞓晒覺，我唯一見佢哋係朝早7點起身送佢哋返學嗰一個鐘頭，我哋住元朗，佢哋喺九龍返學，嗰一個鐘頭盡傾，傾完之後我再返屋企瞓覺，跟住嗰日就唔見㗎喇，有時WhatsApp，好少好少見到個仔，其實心裏面都有啲唔係幾舒服嘅，我老公又係，我老公係一個好重視家庭嘅男人，佢好希望佢老婆成日返屋企，好希望每一個禮拜都有family day，好希望假期一齊去旅行，但當然我做唔到啦，可能一個禮拜有一日返去食晚飯，可能有時會放飛機，有時我早收工，都會選擇同MIRROR去食飯，我老公開始時係唔滿意，而家演化到費事問我。」

老公是否好憎MIRROR？

花姐：「覺得佢哋麻煩囉！有時我話MIRROR咁樣咁樣，佢話：『可唔可以唔好講呀！』唔想喺屋企再提MIRROR，你已經出去返工，唔好再帶啲嘢返屋企好唔好？」

在旁的姜濤忍不住搞爛gag問花姐：「你屋企有冇鏡（mirror）呀？」

花姐透露，細仔女友其實是姜濤fans，不過細仔鍾意MIRROR另一成員Anson Lo，同時亦是《全民造星》忠粉，不時給予意見：「佢哋（兩子）都鍾意MIRROR，但我老公唔鍾意，以前我做嘅節目佢會睇，而家冇。以前一個禮拜嗌4次交，而家一個禮拜嗌3次，因為冇時間。我未至於同老公關係好差嘅，不過我有內疚，我冇做好媽媽、老婆嘅角色，我喺我老公面前係小鳥依人，完全係聽晒人講，唔敢駁嘴，唔敢大聲講嘢……」花姐每讚自己一句，姜濤便O一次嘴：「唔敢想像。」

花姐其實想過放棄擔當經理人角色：「我係咪唔做經理人都唔會餓死？但返到公司，老細話你湊咗呢班仔出嚟又掉低佢哋？好似唔知點咁，好似返唔到轉頭……我都盡量balance。」

過去一年，姜濤個人或是跟MIRROR隊友工作和訪問不絕，不過，姜濤坦言這些都不是自己想要的：「我當初都同佢講，我入咗行之後都唔係做緊我想做嘅嘢，或者係好多好無謂……包括好多訪問，完全好似唔係我咁，完全唔係想像中咁。但冇辦法，一個好矛盾點就係你唔做呢啲，其實大眾好快唔記得你呢個人，更加唔會等你train好晒先再出嚟，因為你已經出咗道，你需要一定曝光率，所以好矛盾，但我都冇辦法，只有一邊出道一邊學習，我覺得呢個係香港演藝圈目前全部都係咁。」

不少人覺得花姐最偏心姜濤，姜濤估計自己工作較多，因而被誤會是花姐給他很多工作機會：「其實我哋平時私底下都冇乜聯絡。」

可曾有MIRROR成員投訴花姐偏心姜濤？

花姐笑說：「當然有啦！但係好早之前嘅事，大家會覺得點解你成日跟住姜濤，佢做錯嘢都幫佢解釋好多，覺得我太偏心佢，心裏邊有唔舒服。佢哋誤解咗我，12個男仔有唔同性格，唔同專長，發展應該有唔同，所以我畀佢哋嘅嘢唔同，對佢哋態度都唔同。我最初識嘅姜濤唔係好鍾意同人講嘢，我身為經理人，好需要了解佢，需要得到佢嘅信任，所以我花好多時間撩佢傾偈。佢係傳媒焦點，我好多時間陪住佢，因為佢好驚，我喺側邊佢會定啲。」

愛全黑打扮及戴口罩出街的姜濤，今年9月在銅鑼灣被警察截查，事發後，姜濤第一個電話是打給花姐，而不是媽咪。姜濤說：「因為我知道件事一定會俾傳媒報道，所以聯繫經理人先，因為聯絡我阿媽冇用，我阿媽唔會幫到我、幫我解答到，因為嗰一下我係不知所措，唔知點做。花姐講過一個artist對所有人都可以隱瞞好多嘢，惟獨對經理人唔可以隱瞞任何嘢。」果然聽教聽話。

花姐承認某程度太過保護一班囝囝：「我對我兩個仔都係，我係一個唔係好肯放手嘅女人，呢個係我缺點，所以我老公成日話你畀個仔長大啦，畀佢哋自己照顧自己，同樣對佢哋都一樣。有時我好驚你（指姜濤）講錯少少嘢，大家會捉住個point針對佢，我好驚，好唔想，我唔想佢哋努力好多嘢，因為好無謂嘅錯誤，跟住俾人傷害，好多次喺佢哋未出嚟之前幫佢擋咗先，其實可能佢哋自己都有能力擋嘅。」

年僅20歲的姜濤，回想出道初時經常被傳媒追問有沒有拍拖，連「有」跟「冇」，姜濤也要問花姐：「我已經依賴到明明冇，我都要問佢有冇，所以我feel到佢而家係放手咗好多，包括好多訪問，佢都係企喺隔離盡量唔出聲，等我哋自己去。」

過去一年，姜濤跟花姐關係比跟自己媽咪更親密，姜濤還自爆：「有次我同阿媽嗌交，佢話：『畀花姐電話我，我要同花姐講你幾咁衰呀！』我開頭唔敢畀，後尾我畀，不過佢最後冇打到。我諗之後會有一次，如果嘈得勁嘅話。」

訪問結束前，記者請花姐為姜濤揀老婆，在謝安琪、麥明詩、莊端兒、陳茵媺、鄭家純、袁澧林、鄺潔楹和花姐8位各具不同美態的女士中，姜濤與花姐不約而同揀了謝安琪。姜濤坦言喜歡謝安琪：「好鍾意聽佢首《囍帖街》，唱歌又好聽。」

採訪：魯吉
攝影：沈健程
攝錄：葉君海

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇