【新增影片】
英超阿仙奴嘅主力阿歷斯山齊士同埋奧斯爾早前被傳會喺一月走佬，但領隊雲格周五出席賽前記者會時，就好肯定咁話佢哋全部都會留隊，而會方仲會喺月尾同韋舒亞傾前途問題。

阿仙奴將會喺周六英超主場迎戰紐卡素，對於山神同奧燒喺球會嘅未來，雲格話:「佢哋全部都會留隊。我會獨立分析每個個案，但總括嚟講，我就希望所有人都留低。」

至於雲格講嘅所有人包唔包括季尾約滿嘅韋舒亞，佢就咁答：「我想同佢傾，時間就係今個月月尾，我想睇下佢可以（為球隊）貢獻幾多。我視佢為阿仙奴嘅人，對佢嚟講，喺度過得開唔開心亦係重要嘅。」

另雲格亦透露艾朗藍斯因腿筋受傷而缺陣三周，而禾確特亦會缺席周六對紐卡素嘅賽事。

--------------------
球迷一定要知！英超一哥曼城，已經登陸『BFB』！登入即送藍月球星： http://bit.ly/2AAiPDS