財爺將財政儲備不斷滾大，佢嘅王牌解釋係：要應付大鱷狙擊港元嘅不時之需。不過，身兼外滙基金諮詢委員會委員嘅港大亞太經濟合作研究中心主任王于漸，竟然話根本冇咁嘅需要。
大教授噚日出席經濟預測記者會後，同華華惡補經濟學。佢話上次港元遭大鱷狙擊，係幾十年難得一遇嘅事，經此一役後，金管局已進一步完善貨幣發行局嘅機制，增加透明度。

幫華華惡補經濟學

下次大鱷如果再嚟衝擊港元聯滙，屆時可以畀港元息率飆升至5000厘至一個月，等班大鱷冇啖好食就自然會退落嚟，一切可回復正常。雖然企業經歷一陣短痛，但總好過政府長年累月積埋啲民資民膏，如果冇事發生就等同浪費彈藥。佢一向主張藏富於民，財政儲備最大嘅用途，應該係預防政府出現財赤時嘅需要。
王于漸又大談經濟同政治嘅關係。佢話經濟學界已有研究指出，一個民主社會，最受惠嘅唔係大多數嘅沉默市民，而係一小撮有組織嘅市民，佢哋透過議會，從大多數無組織起嚟嘅市民身上取得利益，要大多數人受惠係無可能，因為佢哋點樣可以向少數人攞利益呢！
佢又引述經濟學界研究所得，點解二次大戰後啲戰敗國家好似德國同日本，經濟發展會快過戰勝國，原因好簡單，就係戰敗後以往嘅既得利益集團都紛紛被打散，冇人阻住地球轉；同樣，中國大陸文化大革命搞大破壞後，𠵱家經濟先至得以高速發展！華華聽君一席，又上咗一堂經濟課。