今年內地樓市跌到一仆一碌，唔少業主要斷供，雖然市況唔好，但部份豪宅價錢仍然企得好硬淨，好似被譽為「中國十大超級豪宅」嘅廣州金海灣，樓價每平方米仍賣4.5萬銀人仔，屋苑嘅車位更爆出天價。
據《北京晨報》報道，金海灣一個40平方米嘅車位售價高達75萬銀人仔，一個普通嘅20平方米車位亦要標價45萬人仔，咁即係有幾貴？有業主埋怨：「太貴了，75萬現在可以買一套房了」。雖然金海灣嘅車位賣得咁貴，但仍然不乏買家，喺屋苑大堂嘅車位廣告，唔少貼咗已售，聽講仲有40多個業主落咗1至2萬銀人仔定金等買車位。
華華計過，大陸嘅車位一啲都唔細，40平方米相等於香港嘅431方呎，咁一個車位咪可以泊幾架車，計落都唔錯噃。