黎明(Leon)噚日喺fb宣佈將榮升做爸爸，曾與黎明傳緋聞嘅徐子珊今日就出席大台嘅影視博覽嘅活動，記者講到Leon就做老竇，子珊聞言即話好耐冇同Leon聯絡，所以唔會刻意去恭喜對方，但子珊就話Leon做老竇，總之係開心事！

而活動上除咗有徐子珊，仲有黃宗澤、吳卓羲、王敏德、劉心悠、溫碧霞等人，佢哋都係宣傳劇集《飛虎之潛行極戰》及《守護神》，現場仲宣佈劇集與大陸不同網站合作嘅事宜。同場仲有陳瀅、張兆輝、劉奕淳正式簽約成為邵氏藝人。

子珊講完黎明後，就提到佢同劉心悠合作拍攝嘅新劇《守護神》，子珊就話相隔年半再拍劇，就係要啲時間適應，兼且又要修讀心理學碩士，所以就好似啲跨境學童咁，港台兩邊走。而劉心悠亦大讚子珊好學，視佢做女神。

此外，黃宗澤(Bosco)同吳卓羲相隔15年再合作《飛虎之潛行極戰》之外，原來佢哋仲會合唱該劇嘅插曲，但Bosco就爆話其實係苗僑偉唔唱，先變成插曲，改由佢同吳卓羲合唱。佢哋都話今次係相隔十年再合唱，亦唔介意俾人喺網上惡搞。劇中Bosco話會有唔少騷肌場面，反而女仔就冇，同劇嘅王敏奕亦話Bosco為咗騷肌而戒食油同糖。至於劇集嘅主題曲由林峯主唱，吳卓羲就話自己都唔係好理解，亦冇聽林峯講過。

陳瀅同張兆輝就簽約成為邵氏藝人，陳瀅簽約時，樂易玲就話同佢老竇相識多年，係對方託佢照顧囡囡，陳瀅澄清話樂小姐所講嘅「老竇」係佢前經理人公司嘅老闆。張兆輝就坦言今次合作係開心價，自己想演唔同嘅角色，但就無意做導演。

精選娛聞，喺晒《娛果》
http://fb.com/appledailyent