【本報訊】2003年反23條後，泛民氣勢如虹，當時李卓人試探方約恆，有否興趣轉到台前選區議員？方約恆表示「完全冇興趣」。老闆知他個性，從此不再問。方又指，「其實從政係要有少少權力慾，而且每日工作排到密麻麻，非人生活唔啱我……而且要做決定，我冇咁嘅guts」。
時光倒流那些年，方約恆卻有驚人的膽量。1985年入讀香港大學機械工程，對數字興趣欠奉，「嗰時諗，唔讀咪唔讀囉，好過嘥多兩年」，兩年後退學再考A-level，1988年重回港大讀社會學。1989年，方約恆任港大學生評議會會長，「試過通宵砌完banner，朝早就去考試，我都唔知點解，冇乜讀過都會及格，明明我三條答咗兩條……」

赴天安門拉橫額變「觀光」

同年初，方約恆與另外3個學生會成員北上，向中央遞交有關民主基本法意見書，「徐澤（前港澳辦副主任）都係幫手開車門」。當年還帶了banner欲到天安門「打卡」，「我哋同佢講，想去天安門觀光，徐澤突然話：『唔同地方有唔同規矩，你哋都明啦！』」結果，天安門確實到此一遊，「大家你眼望我眼，真係去觀光囉！」
別以為他當年心中的火，隨着議員助理生涯熄滅，港大校長風波、堅持悼念六四、聲援被捕學生、譴責封鎖立法會，所有聯署都有方約恆的名字。不能小覷的更是他轉數之快，泛民上屆議會成功搶奪工務小組話語權，李卓人大爆方約恆有功勞，「佢諗到11點59分（截止日前）入紙去秘書處報名，我咪返去同泛民傾」；《版權修訂條例》拉布戰，方約恆亦有指點迷津，在議事規則中鑽出生天，立法會「活字典」的美名，絕非過譽。
■記者許偉賢