亞視新節目《香港奇案實錄》喺下星期一晚正式推出，本來亞視考慮過將「魔警」徐步高單嘢搬上螢幕，仲諗住搵陳展鵬飾演，但因為案件未完結，所以暫時開唔成。而亞視拍完嘅《奇案》其中一個四集古仔《肥妹殺人日記》，即係講述「肥妹」劉美英離奇被殺陳屍藍田山邊溪澗嘅慘劇，同樣因為案件審訊緊而要臨時抽起，喺下星期嗱嗱臨改拍另一案件《魔鬼天使》頂上。

怕妨礙審訊

《肥》單元原定五月中推出，𠵱家改拍嘅《魔鬼天使》，係講六年前少女擊斃同居男友、支解屍體後，以鹽醃屍藏鐵箱嘅案件，由郭家頤飾演行兇少女，做過《陽光警察》嘅張智堯就扮消防員。亞視高層楊紹鴻噚日就解釋因為「肥妹」被殺案未了結，為免妨礙司法公正至抽起咁話。
描述七宗罪嘅《奇案》一共二十五集，其餘案件仲有由吳岱融扮雨夜屠夫林過雲嘅《午夜狂徒》、由高雄演繹順利邨父親斬女兒頭嘅《屋邨狂父斬頭》、由林偉同八両金扮賊嘅彌敦道忠信表行械劫案《重裝悍匪》、講德福種金案嘅《五屍離奇命案》同埋講世貿示威嘅《危城六日》等。
楊紹鴻又話《奇案》系列會繼續拍落去，唔排除會請當年「紙盒藏屍」案嘅被告、已獲假釋嘅歐陽炳強接受訪問㖭。