ViuTV劇集《詭探》熱播，主演嘅陳子豐同楊偲泳接受《蘋果》訪問，講到鬼﹖原來佢哋兩個都相信呢個世界上有鬼，楊偲泳仲話早排見到類似UFO嘅物體：「喺元朗見到，當時係傍晚六點幾，見到天上有一條直線，開頭以為係飛機，但係佢係停一陣，行一步，停一陣，行一步，正常飛機係唔會停喺空中架嘛，其實之前石澳都見過，啲人話見到都唔出奇，呢個世界咁大，我對呢方面好好奇。」

陳子豐就表示3歲嘅時候家住華富邨，當時亦有一個經歷，佢話：「係我媽同我講番，當時我媽喺廚房煮緊飯，有日同媽咪講『媽咪，今日叔叔好惡呀！』，即係叔叔日日都喺度，第二日又同媽咪講『媽咪，今日叔叔唔俾我睇電視呀！』，嚇到我媽飯都唔煮就返入房，不過我哋都好快搬離華富邨。」雖然拍《詭探》期間，冇遇到任何靈異經歷，但佢哋都會有宗教信物傍身。

如果要佢哋揀撞鬼、生仔、失戀，最怕會係邊樣﹖楊偲泳話：「撞鬼，好驚，我從來都唔睇鬼片，因為我太有想像力，瞓覺嘅時候會凝住，跟住我會發惡夢，我係每晚都會發夢嘅人，我仲會記得自己發過咩夢，之前先夢到一個好恐怖，就係《詭探》嗰幾個小朋友喺工廠入面玩捉伊因搭膊頭，氣氛係唔驚，但我潛意識知道係九廣鐵路嗰單嘢，我冇宗教信仰。」點解今次又會接呢套劇﹖佢覺得都係一個好好經驗，希望自己能夠克服，佢話：「最終都係冇克服，因為拍攝現場有好多人一齊。」陳子豐笑指：「分析番，其實你可能係驚生仔喎！」楊偲泳話：「都驚架，如果你俾我揀，次序係撞鬼、生仔、最後先係失戀，我好怕痛，聽聞生仔嗰種痛係冇得忍；至於失戀，對我人生冇乜大不了。」