皇帝駕崩了，留下九龍半壁江山，同埋生前御駕親征時留下嘅御筆真迹。但係散落曾家國土嘅墨寶，究竟仲剩番幾多呢？仲有邊度可以鑑賞呢？八方幾經奔走，噚日頂住猛太陽標晒成身汗，踏住亡帝嘅足印，終於搵到幾處遺址，立即製成《憑弔皇帝遺寶路線圖》，方便全九龍子民以至鄰邦嘅港島、新界友好人民好趁周末假期，追蹤憑弔。「九龍皇帝」下個月6號出殯，有心人可以去世界殯儀館鞠個躬。

首先，我哋可以喺國土嘅東部出發，即係九龍東嘅觀塘。除咗觀塘警署對出天橋躉之外，座落於裕民坊渣打銀行對出嘅一個電箱，都留低咗一段烏喱馬扠嘅墨寶，好明顯政府已經派人係咁意洗過吓，但係負責清洗嘅工人可能對九龍皇帝仲有幾分敬意幾分忠誠，所以唔忍心洗得咁徹底，等後人仲有一絲追思嘅痕迹。
跟住我哋嚟到彩虹邨一帶。呢度有兩處墨寶遺址，一個喺觀塘道兒童遊樂場對出嘅電箱，另一個就喺坪石邨旁三山國王廟對開嘅電箱。硬係唔明曾灶財因乜事咁鍾意畫花人哋嘅電箱，或者聖上覺得電力能源乃係國家產業，一定要題下御筆以示主權，又或者佢睇唔順眼啲臣民設計埋啲咁老土呆板嘅電箱，用龍手潤飾一下。
各位記住，一場來到三山國王廟睇墨寶，唔爭在拜訪埋間廟。呢間廟大大話話最少有60年歷史，唔知九龍皇帝同三山國王係唔係好熟，所以生前來到發展外交關係。之後我哋去到西九龍，尖沙嘴天星碼頭一條石屎柱躉上面，又有皇帝嘅遺書。
九龍皇帝嘅足迹並唔係只限於九龍半島，對岸嘅中西區一樣可以尋寶。半山扶手梯起點嘅閣麟街，都係聖上出巡過嘅土地。同皇帝相交十幾年嘅文化評論人劉健威幾年前有幸邀請過曾灶財駕臨佢嘅黃色門私房菜館同BlueDoor會所，先後喺00年同03年題過字。

呢兩幅閣麟街墨迹好罕有，事關聖上素來喜歡用毛筆、墨汁書法，好少用白色瓷膠漆題字，但係聖上兩度破例，而且相傳寫完之後，龍顏大悅，非常過癮咁話。可惜其中一幅藍底白字嘅御筆，即將隨住BlueDoor月底租約期滿而消失。不過更加鮮為人知嘅係，原來九龍皇帝曾經西征港島西區，喺堅尼地城屠房外牆同西環道慈佛社牌樓石屎柱上面，仲倖存住皇帝嘅真迹。