當年今日

EURO直擊:冠軍台上的足印 - 雷民

蘋果日報 2008/06/08 00:00


展開歐國之旅,雷民同nowSports攝製隊先去奧地利,抵達辦妥採訪證後,即踩入上演決賽同奧地利首戰對克羅地亞嘅安斯夏普球場,而球場正進行最後粉飾。球場草地一如所料,質素一流,連歐洲足協都給予5星級的評分。
至於球場草地旁邊,一律鋪設仿真草,相信因為方便打理,而後備熱身的跑道位置亦夠寬闊,只係後備席距離球場其實幾遠,教練要提場可能要好出力咁叫,比賽緊嘅球員先至聽得到教練嘅指示。
奧地利首場分組賽響呢個球場對克羅地亞,由於草地質素好到冇得彈,對主隊來講可能不利防守,因為克羅地亞球員平均質素較高,喺完美草地作賽,相信可以盡情發揮技術。
踏足球場之時,因屬員工午飯時間,既然冇人睇場,好奇心驅使下便走上冠軍隊將踏上頒獎台的梯級之上,還偷雞走上去拍照,怎知油漆原來未亁,結果留下腳印(圖)。不知力求完美的奧地利足總有否發現這一個來自香港的腳印,如未有發現,大家可能在電視機旁看到我的足迹。奧地利行家話隊波防守唔錯,期望守得雲開有分落袋。