呢日走上佳寧娜吃午飯，未入房之前，行經大堂，聽見幾張枱嘅男士女士都係講緊阿甘活劇，可見阿甘事件，深入民心，至於大家信邊位，信阿甘還是譚香文代述嘅呢，冇理由企喺度偷聽食客評論嘅啫。
入到房間，賓架G對左丁山講：「你能言善道，我對你有好感！」眾人轟然大笑，泰國R嗌出來：「講多一句，賠十五萬！」好彩左丁山感光快，知道佢地講乜，立即閘住：「喂，我唔係靚女……」泰國R話：「對男士講有好感，賠多二十萬！」
唉吔，以後對男女同事、朋友，千祈唔好講：「我愛你」，「我鍾意你」，「我對你有好感」諸如此類，否則對方一聲「騷擾」，就苦過梁天來，幾乎慘過金葉菊。我地成班人都認為阿甘活劇乃男女之間嘅私事，女事主既唔願露面說明，整件事無以澄清，只係聽阿甘單方面之言，立法會設委員會調查，簡直浪費公帑，浪費時間，若話阿甘缺乏誠信，如女事主不出來對質，旁人知得有幾多呀？如女事主出席立法會委員會公開會議，真的指控阿甘騷擾甚至更多動作嘅話，佢為何唔老早去報警或找平機會，取回公道？
飯後到銀行參加茶會，公關W對左丁山講：「以後唔敢單獨與女同事吃飯或飲o架啡，一定要搵多一個第三者在場。」佢手下全部係女將，避嫌確係要好小心。唔怪得老謀深算嘅財務Y幾個月前請大學mentee在快樂時光飲紅酒，點都要扯埋左丁山陪佢。到場先至知道佢兩位mentee係漂亮女孩，說話得體，醒目非常之尖子學生，財務Y話做得人地學長（mentor），就要一年見番四五次，每次一個多小時，教導佢地社會實況，如何選擇職業及一啲社交禮儀等等，總之學術以外之事，不妨講多啲、教多啲。好少人有財務Y咁慷慨撥出時間請學弟妹吃飯飲酒嘅，錢當然唔係問題啦，時間先至寶貴，財務Y話盡一分力，只為回饋母校，難得之至。但香港社會有時癲癲地，隨時有意想不到之事發生，碰到漂亮女孩子都係有第三者在場好啲，左丁山就因為咁簡單嘅原因，無端端多咗幾餐飯食！