啱啱過咗50歲生日嘅大陸演員吳秀波，雖然一直都低調處理感情事，只係知道佢喺02年同一個叫「尚潔」嘅女人結婚，婚後生咗2個仔，財政大權全部交由太太處理，好好先生嘅形象深入民心，點知喺中秋節嘅前夕，突然有女星自爆同吳秀波有一段長達7年嘅婚外情，而且出軌對象仲唔止得一個！

事緣係大陸女星陳昱霖日前喺朋友圈自爆做咗吳秀波嘅小三已經有7年，但係喺呢7年入面，吳秀波背住佢同正印，偷食其他女人，其中一個仲係有份喺《大軍師司馬懿之軍師聯盟》演出嘅張芷溪，陳昱霖仲話為咗呢個女人，同吳秀波嘈咗好多次交！

偷食事件曝光後，吳秀波嘅好好先生形象陷入破產邊緣，點知今日又有網民爆料，原來只有19歲嘅網紅何藍逗，亦都係吳秀波嘅新歡。有消息話佢哋因為拍《慾望之城》而撻著，劇集煞科之後，一直keep住聯絡，有人見過何藍逗喺網上分享短片嘅時候，見過吳秀波嘅身影！

何藍逗今日喺微博留言，否認係吳秀波嘅新歡，佢留言話：「有些瓜，跟本人無關。演戲三年，一直兢兢業業工作。年紀尚幼，卻突然捲入是非。『譽滿天下者，必毀滿天下』，不敢說委屈，但是敢問心無愧。謝謝大家關注，謠言止於智者。」跟住佢嘅工作室亦發咗聲明，保留追究權利。

之前吳秀波同湯唯合作傳出緋聞，嗰陣佢好嚴厲回應話：「我愛我的家庭，我愛我的妻子、兒子。」但係今次佢潛咗水，未有回應，反而有網民留言，話佢阿媽知道吳秀波偷食之後，都好唔開心，感覺就好似集體失戀咁，連飯都話唔想煮，又話唔會再鍾意佢，甚至仲戥吳秀波嘅原配何震亞心痛！

精選娛聞，喺晒《娛果》
http://fb.com/appledailyent