暑期盛事香港書展呢幾日人山人海，唔止市民走去掃書，明星、暗星走去宣傳，連政界中人都爭住去曝光。立法會選舉嘅候選人固然要拉票，民望插水低處未算低嘅煲呔亦唔輸蝕，噚日朝早除低個煲呔，扮曾爺爺同班天水圍細路傾偈講讀書。
煲呔同呢18個嚟自低收入家庭嘅小學生講，以前未做特首時，都去過一、兩次書展，但做咗特首之後就冇再去過喇，費事搞亂人哋個場，所以今次係佢第一次以特首身份嚟書展。佢仲想當年，話自己細個嗰陣仲未有公共圖書館，要借英文書惟有走去英國領事館同英國文化協會，又話以前成日睇連環圖同兒童故事書，連《天方夜譚》都啃埋，讀完小學之後就開始睇英國大文豪狄更斯嘅作品，除咗中譯本仲睇英文原版㖭喎。

叫小朋友「向世界出發」

煲呔不斷提啲小朋友，要學好英文睇多啲英文書，又話香港係國際城市，大家要學好兩文三語。唔知係咪煲呔講嘢太悶，當佢問啲細路平時有冇睇書嘅時候，大家都冇乜反應。佢又問個坐喺前面嘅小朋友有冇睇旅遊書，個小朋友擰晒頭。班細路仔嚟自低收入家庭，按道理都唔會成日去旅行啦，煲呔又問得幾無厘頭，定係佢想叫啲小朋友睇多啲遊記，但係詞不達意。
煲呔跟手拖住班小朋友去行書攤，自己買咗幾本兒童故事書同英語學習書，唔知係咪要嚟送畀孫女。天水圍班小朋友就每人獲贈一本叫《運動員之一分》嘅勵志書，本書訪問咗14位本地運動員，包括陳敬然、趙詠賢、乒乓孖寶李靜、高禮澤，講吓佢哋嘅奮鬥史。煲呔話臨近奧運，所以揀呢本書送畀佢哋，仲喺上面畫咗隻龜留念，成個親民騷歷時半個鐘結束。
細路仔就話simple又naive啫，成年人就冇咁易被人𠱁到。公民黨梁家傑噚日喺九龍東拉票時，不忘繼續狂寸不得民心嘅曾特首。傑哥喺黃大仙一個街市旁擺陣，叫街坊用大頭針，狂插呢輪佢哋最不滿煲呔嘅豆腐渣施政。短短個零鐘，就有過百名街坊狂插煲呔，當中以不滿佢未能有效解決通脹嘅人最多，有成25支大頭針直插煲呔呢項施政，而煲呔閉門分餅仔請副局長，亦被狂插24針。傑哥話，市民聲音好清楚，煲呔曾再係唔聽民意，民望遲早低過老董。

mailto:[email protected]