當年今日

馮仁昭四圍超:羅霖結婚秦漢踩場打人

蘋果日報 2002/02/27 00:00


羅霖、秦漢同黃子雄前晚喺亞視清水灣片廠,為亞視新劇《勝券在握》趕戲。呢場戲講述羅霖同黃子雄喺婚姻註冊處行禮,而舊愛秦漢就來搗亂。

未打過人
身穿低胸婚紗嘅羅霖,明豔照人,前晚嘅戲分講羅霖同黃子雄結婚,但由於腹中仍懷有舊愛秦漢嘅BB,秦漢心有不甘,就去羅霖嘅婚禮搗亂,秦漢重同新郎黃子雄有碰撞,羅霖於是出手掌摑秦漢,不過羅霖怕打痛對方,所以就借位拍呢場戲。
現實生活中,羅霖表示從未試過打人,佢話:「我不但冇打過以前啲男友,就連𠵱家我啲囝囝都唔捨得打,最多罰佢哋企。」羅霖復出拍戲,但佢話自己十分有分寸,會分配時間陪老公同家人。

鍾麗緹拍拖唔講金
鍾麗緹同喺美國出世嘅Band友嚴振翔拍拖,呢輪鍾麗緹冇乜嘢做,佢同男友成日留喺愉景灣屋企煮飯仔,兩個人都過得幾甜蜜。
不過聽聞鍾麗緹嘅男友同屋企人好似搞得唔係咁愉快,所以就算想做生意都唔多夠資金,但鍾麗緹對呢啲嘢就唔多計較,佢一向係愛情至上,唔會計較個男友有冇錢。咁嘅女仔,去邊度搵呢。

羅兆輝愈搞愈High
馮仁昭個朋友講,話羅兆輝成日同人講有記者暗戀佢,講完重要攞張佢同記者嘅合照畀人睇,但知佢性格嘅朋友,一睇就估到係佢拉住人合照。而馮仁昭另一朋友有次喺街,見到坐喺私家車後座嘅羅兆輝,不過馮仁昭個朋友話佢當時個樣係眼反反,頭岳岳,一個high樣。唉,做乜搞成咁!
柏芝北上做河東獅
中國星最近搵咗馬偉豪開戲,今次佢想拍古裝片《河東獅吼》,重搵咗張柏芝同古天樂。哈!呢輪啲觀眾唔係咁受古裝片,馬偉豪重拍呢類片種,又真係幾奇怪,而且拍呢類古裝片,成本肯定唔低,所以拍呢啲片真係要小心。

梁朝偉被嗌做總統
大家都知影帝梁朝偉個英文名叫Tony,但偉仔暗地裏重有個英文名,唔係佢老友都唔會知,就係叫President,總統呀!叫得佢President呢個名,即代表佢同偉仔交情不淺。至於點解佢會叫總統,因為佢每次出埠工作都有個規矩,就係指定要入住總統套房,所以PresidentLeung就係咁嚟。

《慌心假期》蝕到心慌
星皓電影公司上年拍咗幾部大片,聽講淨係一部《慌心假期》都蝕唔少錢,冇二千萬都有一千萬。星皓老闆王海峰雖然對製作電影好有熱誠,但佢公司嚟緊嘅製作都唔係走商業路線,咁搞落去,金礦都唔夠蝕,所以佢真係應該諗吓搵啲乜嘢導演開戲比較有保障。