之前北上搵銀嘅方力申，近年回巢香港發展，今日佢終於宣布重投恩師黃柏高（Paco）旗下，加盟太陽娛樂文化，亦代表佢跟女友鄧麗欣（Stephy）再次簽同一間公司。

記招今日假尖沙嘴舉行，當播放許志安、雷頌德及Stephy祝賀片時，Stephy稱小方為師弟，並叮囑男友:「聽聽話話，乖啦。」當三位祝賀片播畢後，小方即說：「下？我得三個朋友咋。」隨後司儀再播出汪明荃、葉念琛及劉鎮偉導演嘅片段。

再跟Paco簽約，小方笑稱全因女友在Paco手上，要加盟入公司搶回女友，Paco送上一把寶劍作禮物，又話今年係電影《獨家試愛》十周年，佢計劃六月會再為葉念琛、小方及Stephy開戲。受訪時被問到是否女友拉攏加盟？小方話:「唔可以咁講，返嚟香港簽畀Paco係理所當然嘅事。」

記招上獲Paco讚係「好好先生」，傳媒追問小方是否已秘婚，他尷尬話「我以為Paco講『好好先生』係指我係好好老師，我都唔知自己將來係咪好好先生（丈夫），因為好好先生要有好多時間照顧屋企。」

至於跟女友會否再組情侶檔，小方表示都會有，應該係喺電影方面為先，佢話:「嚟緊電影合作上，希望同佢（Stephy）可以少啲爭吵，因為演員通常都有自己意見。」講到佢喺台上表明唔想工作上嘅爭吵帶返屋企，係咪表示兩人已經同居？小方話:「唔係，講緊係分別兩個人各自屋企。」