薛家燕主持《流行經典50年》噚晚請羅力威擔任錄影嘉賓，家燕姐透露最近好忙，要編排座位表，阿仔下周一結婚，又要安排其他事宜，未知係唔係忙得滯，家燕姐日前試奶奶衫都有啲鬆身，令佢好開心，家燕姐仲感謝答應出席婚禮嘅圈中朋友，好似當日要出席三個婚禮嘅楊受成老闆，同埋婚宴後趕飛機返大陸開工嘅祖藍，薛家燕仲預告婚宴當晚，或者會忍唔住流開心嘅眼淚。

羅力威快嚟32歲生日，不過老婆雨僑撇低咗佢，去咗澳洲，所以生日就同歌迷一齊過，問到今年會唔會想要BB做生日禮物，羅力威坦言唔知自己可唔可以教出一個乖嘅小朋友，要先請教身邊嘅朋友，生B計劃大概喺兩、三年內進行。

羅力威又話同老婆跟好少互送啲唔啱用嘅嘢做禮物，仲爆兩公婆平日最鍾意玩煮飯仔，老婆下廚，羅力威就乖乖去洗碗，羅力威又話婚後除咗寫情歌之外，都想做啲唔同嘅音樂。

精選娛聞，喺晒《娛果》
http://fb.com/appledailyent