今年69歲嘅台灣綜藝天王豬哥亮喺2014年確診患上大腸癌二期，不過佢一直唔肯入院接受治療，拖到今年先定開刀做手術。今日豬哥亮喺台大醫院主治醫師梁金銅同囡囡謝金晶嘅陪同下，喺醫院開出院感恩茶會。

精神狀態幾好嘅豬哥亮話：「感謝台大救我一命，我從鬼門關回來，那時候我吃不下，也大不出來，腹積水已多達6,600cc，肚子很大，大到48腰，再拖下去，我的肝就壞了。我住進來時已經是大腸癌末期，醫生說我再不開刀，壽命會只剩4個月。」

豬哥亮話佢自己唔怕死，還有很多事要了結，仲話做完手術後，一度瘦到得番56公斤，最近先回升到59.4公斤。因為唔想裝人工肛門用尿袋，醫生幫佢改裝人工造口，豬哥亮話：「我後面上廁所正常，前面會排少一點，也可改用坐的上廁所。」

不過醫師叮嚀豬哥亮要注意保養，仲提佢出院第21天後必須返診所做第3次化療，但係已經做咗兩次化療嘅豬哥亮，就話覺得自己冇嘔吐或甩頭髮等副作用，亦都冇食慾不振：「食慾是看我自己，想活就要吃，我有請朋友幫我做土豆豬腳吃。」

至於女兒謝金燕有冇致電問候關心？豬哥亮話：「不要提她。」台灣《蘋果》亦曾經向謝金燕嘅經理人了解，但係一直冇回覆。