當年今日
關於我們

【家長投訴迪士尼】寧正確引導囝囝 羅霖:同性戀唔可以隱瞞忽略

蘋果日報 2017/03/03 15:49

美女與野獸Beauty and the Beast迪士尼羅霖同性戀

迪士尼嚟緊真人版電影《美女與野獸》(Beauty and The Beast) 改篇原著,將同性戀原素加入咗故事入面,令到香港、海外家長好不滿,擔心教壞仔女,聯署要抗議迪士尼宣揚同性戀。
已經係三子之母嘅單親媽媽羅霖,今日接受《蘋果》電話訪問時講:「套戲未上,未睇內容,近呢幾年迪士尼卡通片唔似以前夢幻、童真元素,我哋都要持開放態度,家長引導較好啲。」
講到會唔會畀三個仔去睇呢部戲,羅霖話細仔Jonathan有興趣睇:「我會陪佢睇,有呢類型嘅嘢,會引導佢,話畀佢聽正確姿態,亦都畀佢知道社會上有呢啲事存在,唔可以隱瞞、忽略呢件事,要正確面對,我唔係鼓吹,但係我都唔會絕對反對呢件事。」
有家長喺網上反對同性戀,不過羅霖就好開明,對同性戀睇法相當包容:「o依家冇辦法,同性戀好普及化,尤其係外國、美國,又可以結婚,加上網絡咁發達,啲小朋友會受到影響,家長係阻止唔到。作為家長,唔希望自己仔女係咁樣。當自己仔女係咁樣,做父母一定要包容同接受,如果唔接受,佢更加唔會同你傾訴任何事。」
羅霖最後點出一個道理,家人永遠都應該企埋同一邊,佢話:「同性戀呢條路好偏,已不為社會所接受,如果連屋企人都唔接受,會更加無人理佢,你無可能趕佢出門口,同佢斷絕關係,除咗係愛,要包容同忍耐同引導。」