民陣多次舉辦反送中惡法遊行，6.9有103萬名市民參與，政府仍拒撤回，激發6.12警民衝突，造成至少80人受傷，更有警察對示威市民頭部開槍。有市民在目睹警方上周三暴力清場後，不滿警方濫用暴力對待學生，今日（16日）初次上街發聲。

現時就讀中三的張同學今日首次參與遊行，指「如果再唔出嚟就會後悔，同埋呢個係我哋嘅香港」，上周因考試未能出席百萬人遊行，指今日「雖然唔知出嚟有冇用，但出咗先，我驚以後冇機會。」張同學對於6.12警察暴力清場感到心痛，她認為警方面對手無寸鐵的學生用如此武力清場，「我哋得把遮，佢哋就成身裝備，冇人性」，更指林鄭月娥宣佈暫緩修例只是緩兵之計，「今日如果唔出嚟，隨時星期四就二讀」。

同行的梁同學亦是首次出席遊行，她表示上街是因為「香港而家搞成咁，想出來幫手做啲嘢。」她不能接受警察所使用的暴力程度，「林鄭仲話天經地義，但現在係對住個頭同眼嚟射。」

近30歲的工程師Martin被警方上周三暴力清場激發，今日同樣首次上街，「佢哋用太過份暴力，有乜理由吓吓打頭，有乜需要用橡膠子彈？唔係話佢有權就大晒。」Martin又認為，逃犯條例修訂若通過，港人隨時被政府「任意charge，我哋邊度仲有保障可言，邊度仲有言論自由？」

今日首次出來遊行的余小姐指，她上周本已希望去遊行，惜無法抽身，然觀乎近日事態發展，覺得一定要站出來，「如果今日少人過上次，就會畀政府覺得民意好似舒緩咗，但我唔想畀政府有呢個錯覺」。余小姐直斥林鄭昨日現身本應平息民憤，「但你見佢個樣係好不屑」。她直言不接受政府的暫緩方案，「見過去好多法例都係暫緩完一排，風頭過咗之後又再提返，用另一包裝重新推返出嚟」。

她指，上街是因為「警察很過份」，從網上不少片段顯示，當日（6月12日）很多示威者手無寸鐵，已經沒有任何反抗能力，卻被警方「撳住嚟打」；更甚的警方秋後算帳到醫院拘捕的行為很過份。對於警方所指的警員使用手法克制，她直指「完全見唔到」，更有不少濫權情況。更對林鄭月娥的「母親論」表示「唔好玩啦！我唔想要啲咁既老母！」，認為她完全沒有為香港人著想，「上次103萬人參與，都仲可以話有其他（即餘下人數）支持」，漠視港人訴求。這次遊行，她的訴求是希望可以懲戒警察，以及要徹回條例，「我們不要暫緩，暫佢老母啊！」

從事保險業的李小姐則表示，由於政府只決定暫緩而非撤回，故令她認為一定要出來遊行，過去雖然一直有關注社會事務，但也因為未感到「埋身」的壓力而沒有出來，「呢條法例係絕對唔可以通過，修例真係影響緊每一個香港人，香港同內地法制唔一樣，香港法庭亦都做唔到最後嘅把關，如果通過咗香港就已經算係行大陸法㗎啦，為下一代一定要行出嚟」。

李小姐與同行友人亦以紙張摺了一朵朵白花，打算放置於太古廣場外，「其實真係無諗過有人要因為呢件事而死，即使12號個日都無諗過會開槍，唔知點解要咁」

昔日新聞：電視辯論互叫熄咪 曾：你係撕裂2.0 林鄭：會順應民意辭職

【引渡惡法●懶人包】大律師公會逐點K.O.政府修例理由
【引渡惡法●懶人包】一文睇晒立會法律顧問7點質疑修例

民陣6.16反惡法遊行

日期：6月16日（日）
集合地點：維園
時間：下午2時30分集合、3時正起步
遊行路線：維園至金鐘添美道立法會
（資料來源：民陣）

-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】繼續撐蘋果
請往蘋果日報網站了解更多