【新增影片】因為離婚而與女兒葉子青一度不相往還嘅李司棋，近年佢哋關係和好，兩母女不時相約去旅行，平時亦靠電話溝通維繫感情。今日有周刊報道，喺07年同「多倫多第一台」高層黃安信（Anson）再婚嘅葉子青，原來喺今年5月離婚，結束9年嘅婚姻關係。

報道話雖然佢哋已經分開咗一段時間，但係一直都保持好關係，不過真正嘅原因冇人知，有身邊人話可能因為子青本身好識享受，但係Anson只不過小康之家，唔知係咪因為咁而令佢哋有距離，仲話子青喺5年前試過流產，之後冇再聽到佢再有BB。

其實當初佢哋結婚嗰陣，都諗住可以白頭到老， Anson當日喺婚禮上接受本報訪問，坦言拍拖初時飽受冷言冷語，不過佢話：「兩個人經歷好多困難，先至能夠埋一齊，所以我份外珍惜子青。」估唔到呢段婚姻只係維持咗9年，子青同媽咪一樣，先後經歷過兩次婚姻。

司棋姐早於85年移民加拿大做「太空人」，法醫丈夫葉志鵬留港發展事業，四年後司棋姐發現男方有第三者，決定離婚。當年司棋姐39歲。女兒葉子青選擇跟爸爸生活，令司棋姐大為傷心，母女更斷絕聯絡七年。離婚後三年，她和製衣商人何偉強再婚，這段婚姻不夠三年就分居，99年正式離婚。同年，司棋姐罹患子宮頸癌，當時佢仲係瞞住拍《真情》嘅拍檔，獨自入院做手術。司棋姐戰勝了癌魔，但何偉強沒有，他在01年因腸癌離世。今年六月，其首任丈夫葉志鵬也因病離世。

司棋姐曾這樣形容她兩段婚姻：第一段是，「你好愛佢，但佢有另一個女人，仲點要佢？我人生買第一隻勞力士錶都係買俾佢。對於呢段婚姻，我問心無愧。」

第二段婚姻是，司棋姐說：「呢頭離婚，覺得冇咗頭家，就快老喇，仲可以嫁俾邊個？嗰陣啱啱有個男人，又係啱啱離婚，又靚仔，又想同我結婚，所以即刻嫁俾他。我承認係衝動，但無悔。」