小小超李澤楷同正印混血女友羅愛欣（Rachel）及緋聞女友梁洛施（Isabella）嘅三角關係，連日嚟成為全城熱話，日前新戲《盜墓迷城3》嘅荷李活導演洛高漢（RonCohen）大爆曾經同Isabella以及佢嘅未婚夫Richard喺洛杉磯食飯，而另一邊小小超嘅混血女友Rachel又聲稱同男友好開心，令呢段三角關係更加撲朔迷離！
正當呢段三角關係越搞越複雜之際，噚日內地報道指有人爆料，話李澤楷日前同一名神秘女伴現身北京萬達電影院，當時有人目擊一名身形高䠷、樣貌標致嘅女仔喺戲院入口處落車，陪伴喺佢身邊嘅正係小小超，當時唔少等候入場嘅觀眾都睇到呢一幕，甚至有人好驚訝咁叫出李澤楷個名㖭！

報道又指當時李澤楷本來輕輕攬住女伴嘅纖腰，但知道有人留意佢就即刻放手，不過仍然好大方同女伴步入戲院，兼且親自幫女伴買奶茶，表現十分體貼，目擊者更堅稱嗰位靚女並非Isabella或者Rachel。
除此之外，本報噚日都收到近似嘅消息，指李澤楷喺星期二（6號）晚上8點左右，同一名妙齡女郎結伴到嗰間戲院睇戲，估計佢哋係欣賞荷李活新戲《鐵甲奇俠》（IronMan），而嗰個靚女身穿運動服，年輕貌美，兩人一出現即刻引嚟現場市民嘅目光，由於呢位神秘女郎未有開腔講嘢，所以唔知佢係講邊種語言，如果真有其事嘅話，咁Isabella同Rachel又多位神秘對手啦！