【歐聯奇蹟】尼馬「找數」入兩粒 魯營神話早有劇本?
尼馬安歷基歐聯巴黎聖日耳門巴塞隆拿
【新增動新聞】
巴塞隆拿喺周三歐聯16強次回合主場大勝巴黎聖日耳門(PSG)6:1,兩回合計反勝6:5晉級呢場波真係好睇過戲,88分鐘至完場連入3粒更係劇本都寫唔出咁精采!其實馬後炮咁講,巴塞將帥安歷基同尼馬一早畀晒「貼士」各位,因為佢哋賽前一個話全隊入到6球,一個話自己入到2球,結果全部中晒,呢啲咪找數真漢子囉!
預知能力就未必有,但安歷基早喺周二記招就揚言,話既然有球隊入到巴塞4球,佢哋都入到6球咁話;至於尼馬日前又被指喺更衣室同隊友輸賭,話呢場入到兩粒云云,結果尼馬喺88分鐘同補時連下兩城,巴塞又真係贏到6:1咁囉。
對於領軍奇蹟反勝,尼馬賽後話:「呢場係我人生中最美好嘅一場賽事,為着歷史,為着入波,為着球隊踢出高水準。」佢又趁機抽吓美斯水,話呢位同球會仲有唔夠年半合約嘅阿根廷球王踢完呢場肯定會續約啦!